Hai zugt de peperneuten op toavel.” Is t nou al weer zo
ver?”
“Ja, t is al begun oktober. Doe eetst toch ook t haile
joar deur sunnerkloaskoekjes?”
“Das speculoas, das heul wat aans.”
“Nee hor, wie
zeden der altied sunnerkloaskoekjes tegen.”
“O ja, en omdat joe dat er vrouger tegen zeden haiten zo
ook zo?”
“Nou ja, ik wait nait beder.
Wie deden ze vrouger zulfs op n plakje stoet. Dat vonden
wie lekker.
Den werden de koekjes heulemoal zaacht mor t smoakte as n
gebakje.
Zol k doarom ook zo gek op zaachte peperneuten weden?”
k Zai nog veur mie hou oma met n haand vol peperneuten
achter mie ston as k bie opa en oma ston te zingen veur kachel ien keuken. Opa
waas altied net even vot.
Hai kroop op zolder om en moakte wat lewaai.
t Mos zwaarte Piet veurstellen dai toen nog gewoon zwaart
weden mog.
As t zingen oflopen was goeide oma heur haandvol
peperneuten over mie hen asof ze van boven kwamen. k Haar t wel deur dat ze van
heur kwamen mor t was n mooi spel.
Den kwam opa keuken ien en vroug wat er toch loos west
was.
Haren wie dat lewaai op dak ook heurd?
Oma zee dat er ain strooid haar en dat er ook aargens n
bord verstopt was met lekkers,
ik mog t opzuiken.
t Ston altied ien bedsteekaast.
Sukkeloadebaisjes, widde, caremelkleurige en broene borstploat,
sunnerkloaskoekjes en peperneuten.
En gekleurde schoemkes met sunnerkloas zien gezicht derop
of klompkes of n Piet ien t roze, geel of groen. Misschain begonnen doar de
regenboogpieten al om t houkje te kieken.
Mien opa en oma mossen es waiten dat ze trendzetters
waren met heur regenboogpieten op t bord vol lekkers.
Coby Poelman – Duisterwinkel
Geen opmerkingen:
Een reactie posten