Stofzoeger op leeftied

Ik ben n stofzoeger op leeftied
en roas deur t haile huus.
t Is stofhappen bloazen veur altied
over perket, plefond en plûche.

k Zit vol met zoagsel, blad, naalden
spinnen, mieren, pissebedden en stof.
k Mot er allernoast van kokhaalzen,
zelfs mien boetenkaant wordt dof

want ze sjorren zo aan mien slang,
mien lief schampt vaarf van deurposten oaf.
Ik knal tegen toafelpoten en behang,
vlaig den op e sloapkoamers oaf.

t Gait er om weg as ik mien ronde dou,
t is een lewaai van jewelste.
Veuls te voak mot k op sleeptouw
en k ben al nait meer de snelste.

Noa oafloop van t gebeul
baargen ze mie ien kaast
noast de striekplaank en den is t mis
omdat het nait goud paast.

Mien slang steut tegen kaastdeur,
dai vaalt op slag weer open.
Bie t dichtdrukken krieg ik n neie scheur.
Beplakt wor ik deurlopend.

Mor nou zit ik te boalen.
Ik heb het hailemoal had
en zwieg ien alle toalen.
Goa moar om n aander op pad.

Coby Poelman-Duisterwinkel.