Hemd met franje

Hai is host negentig
mor nog goud op dreef.
Ien t bouk stait:
groag wat nije hemden,
zai vroeg zich ook al oaf
woar alles bleef

ik zuik en vien
een stuk of wat
ien n grote blauwe krat
leg vief op toafel

is dit van joe
joa dat bennen mienend
hai trekt zien trui omhoog
ze konnen gain ain meer vienden
nou zit ik hier veur t oog
ien mammes hemd met franje...

dat heurt er n beetje bie
lachen wie
ien een appartement
met koamers van oranje.

Coby Poelman-Duisterwinkel