Van harte welkom

Van harte welkom op mijn gedichtenblog.
U mag de gedichten ongewijzigd gebruiken met vermelding van mijn naam.
Voor het verzorgen van een lezing met voordrachten of een workshop kunt u contact opnemen via cobytjeert@live.nl
Er is ook een volledig programma voor Kerst en Pasen met eigen geschreven gedichten en een verhaal.
Mijn boeken zijn verkrijgbaar via mijn mailadres en te leen in de bibliotheek.
Er is ook nog een interview te beluisteren van enkele jaren geleden. https://soundcloud.com/user-671424345/interview-coby-poelman-duisterwinkel-10-07-2017

vrijdag 9 oktober 2015

Händel



Onze kat wordt old. Hai loopt nait meer zo haard, hoart wat meer uut en roekt ook minder lekker.
Hai het n pooske leden nog n kuurtje had woar der n beetje van opknapte. Met twoi man staark wollen ze hom beethollen omdat dit nog n volle koater was en dai bennen der nait veul meer op zien leeftied. Was hail nait neudeg want Händel dut gain vlaig kwoad.  Ze waren heulemoal onder iendruk van zien mooie broide kop, n zeldzoamhoid! Händel was t op n duur zat en wol weer ien zien kattehokje op achterbaank van auto met noar huus.
Hai eet as n slootgroaver en drinkt nog altied op kneien uut viever. Dat viendt er lekkerder dan schoon wodder uut zien bak.

Mor leste tied bennen der aal meer mensen dai zich met hom bemuien.
“Joen kat zugt er best uut”, zegt oin, aander zegt; “joen kat wordt zeker n dagje older”, ientussen steels de plukken hoar op de mat bekiekend. Weer n aander zegt: “Hou laang hemmen joe dai kat aigelek al?”
Lest kwam er n vremde bie deur met de vroag of wie n vaaierkaante meter zee kopen wollen.
t Ging veur n aktie om de wadden schoon te hollen. Wie haren der al noit veul fedusie ien mor dou der ook nog vroug: “Is die kat van jullie? Hij loopt mank!” wer mien man zuver n beetje frandereg. Wat bemuien mensen zich aalmoal met ons kat. As dizze kat uut tied komt wil k goin kat weer hemmen.
t Ken tegenworreg noit meer. t Is n heul aander tied as vrouger.
Brutoalste vroag was of er zien pottemenee nog haar en of er nog wel actief was op koatergebied.
Händel keek zo beledegd, zien heule holling drukte uut; doar vroag je toch noit noar en ik was t heulemoal met hom oins.


Coby Poelman -Duisterwinkel

Geen opmerkingen:

Een reactie posten